餐廳裝修要注意咩｜廚房排煙、隔油同動線

餐廳裝修流程：點樣同食肆牌照一齊規劃

餐廳裝修同一般店鋪最大分別，係工程圖則要符合食肆牌照要求。如果先裝修後諗牌照，好容易要拆咗再做。建議次序：

1. 租舖前查核：確認舖位用途、公契有冇限制經營食肆、有冇位置接駁排煙同去水。
2. 決定食肆類型：普通食肆定小食食肆，兩者可以做嘅食物同要求唔同，影響廚房設備。
3. 設計廚房同機電：排煙、補風、氣體、電力、去水、隔油，先定廚房再排前場。
4. 準備牌照圖則：按食環署要求準備平面圖同相關資料，屋宇署同消防處會就樓宇安全同消防提出要求。
5. 施工：按提交嘅圖則施工，避免中途改動影響審批。
6. 完工及驗收：各部門視察、提交證明文件，符合要求後發牌。

牌照種類同申請次序可以參考店鋪裝修牌照懶人包。實際文件同條件以食環署最新發出嘅指引為準。

廚房排煙同通風：餐廳裝修最花心機嘅部分

餐廳廚房排煙要處理三件事：抽得走、隔得油、唔滋擾鄰居。排煙設計做得唔好，輕則廚房悶熱、油煙飄出前場，重則被投訴甚至要重做。

抽得走：抽風量同煙罩配合爐具

煙罩尺寸要覆蓋所有會出煙嘅爐具，抽風量要按爐具類型同數量計算。中式鑊爐同西式扒爐嘅油煙量分別好大，設計時要講清楚菜式。

隔得油：油煙處理設備

排出嘅油煙一般要經過濾網及油煙處理設備（例如靜電除油煙機）先排出，定期清洗保養亦要預留檢修位。環保署對空氣污染同氣味滋擾有規管，排放位置要特別小心。

唔滋擾鄰居：出口位置同補風

排煙出口要遠離住宅窗戶同行人位置。抽走幾多空氣，就要補返幾多新鮮空氣，否則廚房負壓，門會難開，前場亦會吸入油煙味。

食肆通風系統一般要由合資格承辦商安裝並提交相關證明，詳細要求以食環署最新規定為準。煙機、排風同補風嘅原理可以參考廚房裝修抽油煙懶人包。

隔油設施同去水：一早要預留位置

餐廳廚房嘅污水含大量油脂，一般要經隔油設施處理先可以排入渠道，並可能需要按《水污染管制條例》申請排放牌照，要求以環保署最新指引為準。

• 位置：隔油池或隔油器要放喺方便清理嘅位置，唔好收埋喺難開嘅櫃入面。
• 尺寸：要按餐廳規模同用水量決定，唔好為咗慳位揀太細。
• 去水斜度：廚房地台要有足夠斜度去地渠，避免積水。舖位地台要升高鋪喉，就會影響門口同前場高度。
• 清理安排：定期清理油脂，廢油要交合適嘅收集商處理。

去水位係舖位最難改嘅地方。如果原有排水口離廚房好遠，可能要升高地台，呢點要喺設計初期同裝修公司確認。

前後場動線：餐廳裝修點樣排座位同廚房

餐廳動線原則係「客人、食物、髒碗、垃圾」四條路盡量唔交叉。細舖位做唔到完全分開，都要避免上菜同收碗撞埋一齊。

座位數目唔係越多越好。牌照同消防對座位數目、出口數量有要求，走道太窄亦會令侍應效率低。雋域設計會用 3D 設計圖模擬座位同動線，開工前睇清楚。

餐廳裝修物料：防滑、防水、易清潔

餐廳物料要揀耐用、易清洗、唔吸油，靚但難清潔嘅物料好快會變殘：

• 廚房地台：防滑地磚，磚縫要用耐油易清潔嘅填縫劑，牆角同地台交接位宜做圓角方便清洗。
• 廚房牆身：光滑防水物料，例如瓷磚或不鏽鋼板。
• 前場地台：考慮客人帶水入嚟同頻密拖地，避免光滑拋光面。
• 枱面同吧枱：耐熱耐刮，接縫少。
• 座位：布面容易吸油，可考慮易抹嘅物料。

氣體喉管同爐具接駁工程，須由註冊氣體工程承辦商僱用嘅註冊氣體裝置技工施工；電力工程須由註冊電業承辦商施工並發 WR1。

餐廳裝修 5 個常見錯誤

1. 租咗舖先發現排煙出唔到：要大改設計甚至唔可以做熱廚。
2. 廚房面積太細：為咗多幾個座位壓縮廚房，出菜速度追唔上。
3. 電力唔夠：冇計齊所有廚房電器、冷氣同雪櫃，要申請加大電力供應，延誤開業。
4. 圖則同實際施工唔一致：牌照視察唔通過，要執返先發牌。
5. 冇預留清潔檢修位：隔油池、煙罩同煙喉難清，日後保養成本高。

如果時間緊，可以參考店鋪裝修趕開業懶人包，了解點樣分段交收。

常見問題