廚房翻新報價｜報價單分項同計價方式拆解

廚房翻新報價點計？六大工種各有計價單位

一份正常嘅廚房翻新報價，應該可以按工序順序逐段睇落去。每個工種用嘅計價單位唔同，知道每項應該用咩單位，就即刻睇得出邊項寫得太含糊。下表係香港廚房翻新報價常見嘅分項同計價方式：

如果收到嘅報價只有「廚房翻新一項」或者「廚櫃連檯面一套」，冇長度、冇物料、冇數量，就算總數睇落合理，都好難同第二份比較，亦好難喺驗收時追究。想再深入了解整體預算點分配，可以參考廚房裝修預算懶人包，本文集中講點樣睇得明報價單本身。

廚櫃同檯面報價：按呎計要睇清咩

廚櫃同檯面通常係廚房報價入面最大嘅一筆，亦係最多細節嘅部分。同一個「按呎計」，入面包咗咩可以差好遠，所以要逐項拆開睇。

地櫃、吊櫃、高櫃要分開列

地櫃要承托檯面同星盆，吊櫃要掛牆，高櫃（例如乾貨櫃、電器高櫃）高度同五金都唔同，三者用料同工序有分別，報價應該分開寫長度。如果報價只寫「廚櫃若干呎」，要問清楚係地櫃同吊櫃加埋計，定係只計地櫃再送吊櫃，兩種講法差好遠。

板材、門板同五金要寫型號

櫃身板材（例如防潮夾板、實木多層板、密度板）、門板飾面（例如膠板、焗漆、吸塑）、鉸鏈同路軌品牌，都會直接影響價錢同耐用程度。報價單最少要寫明櫃身板材種類同厚度、門板飾面、五金品牌或系列。抽屜、拉籃、轉角架通常按件另計，要逐件列出。

檯面計長度之外，仲有幾樣附加項

檯面一般按長度或按件計，但以下幾項好多時另外收，報價要寫清楚包唔包：

• 星盆孔、爐頭孔、龍頭孔：枱下盆要磨邊，開孔工序較多
• 擋水邊（後擋水）：有冇做、做幾高
• L 字或 U 字轉角拼接：拼接位點處理、有冇加收
• 前邊收口：直邊、圓邊定加厚邊
• 拆舊檯面：特別係舊石屎檯，拆除工序同廢料量大

拆舊、水電、泥水：最易含糊嘅三項

廚櫃同檯面睇得見，但拆舊、水電同泥水屬於「封咗就睇唔到」嘅工程，報價寫得含糊最易出事。

拆舊：寫明拆到邊個程度

「拆舊廚房」可以係只拆櫃，亦可以係拆櫃、拆磚、鑿地台、拆假天花。報價應列明拆除範圍、廢料搬運方式（有冇升降機、要唔要行樓梯）同運走廢料。如果大廈管理處規定指定時間搬廢料或者要付按金，都應該喺報價或合約講明由邊個負責。

水電：用「位」嚟數，唔好用「一項」

廚房電器多，電力最易唔夠用。報價最好寫明：

• 檯面插座新增幾多個、洗衣機同雪櫃位點處理
• 電磁爐、焗爐、即熱式熱水爐等大電器係咪拉獨立電路
• 使唔使換或者加大電掣箱
• 完工後由註冊電業承辦商發出 WR1（電力裝置完工證明書）

水喉方面，要寫明換唔換供水喉、用咩喉料、去水喉換唔換、星盆位有冇移位。涉及煤氣喉改動，要由註冊氣體工程承辦商派註冊氣體裝置技工處理，報價應該分開一項列明。

泥水：面積、磚料、底層處理

牆地磚按平方呎計，但價錢會受磚嘅尺寸、鋪法（例如大磚、斜鋪）、要唔要先批盪執平、地台有冇做防水影響。報價要寫明鋪磚面積、磚型號或由業主自選、包唔包磚料、包唔包防水同收邊條。

一份合格嘅廚房翻新報價單要列咩？檢查清單

收到報價之後，可以用以下清單逐項剔，答唔到嘅地方就要求對方補充：

1. 工程範圍：拆邊啲、保留邊啲、有冇改間隔或者移門位
2. 數量：廚櫃長度、檯面長度、鋪磚面積、插座數量逐項寫明
3. 物料規格：板材、門板、檯面、磚、五金寫品牌或型號
4. 供料責任：邊啲由公司包料、邊啲由業主自購（例如電器、星盆、龍頭）
5. 附加項目：開孔、拼接、收口、拉籃抽屜逐件列明
6. 證書文件：電力 WR1、氣體工程完工資料
7. 工期同付款：開工日、完工日、按進度分期
8. 保養：櫃體、五金、檯面、水電各自保養期

常見中伏寫法

• 「廚房全包」但冇列明拆舊同廢料：開工後先話拆石屎檯要加錢
• 「廚櫃一套」冇長度：完工時吊櫃短咗一截，都好難追
• 「電器安裝」冇寫件數：抽油煙機駁喉、洗碗碟機駁水另外收
• 「水電按實際計」冇單價：等於開放式加數

更多報價單陷阱可以睇裝修報價單懶人包。

度尺前要準備咩？由報價到完工時間表

度尺前準備越充足，報價越準，日後改單加數嘅機會就越少。建議預先準備：

• 電器清單：雪櫃、抽油煙機、爐頭、焗爐、洗碗碟機嘅型號同尺寸
• 煮食習慣：用煤氣定電磁爐、多唔多爆炒、要唔要放洗衣機
• 現況相片：廚房四面牆、天花、星盆底同電掣箱
• 大廈規矩：管理處開工時間、搬運廢料規定、要唔要交申請
• 保留項目：有冇想保留嘅電器、熱水爐或者地磚

一般流程係：上門度尺 → 出 3D 設計圖同逐項報價 → 修改確認 → 簽約 → 開工拆舊同水電 → 泥水 → 廚櫃檯面安裝 → 電器安裝及驗收。訂造廚櫃由度尺確認圖則起計，一般約 3 至 6 星期出貨安裝，視乎件數同板材供應。期間冇廚房用嘅日子，最好預早安排。

常見問題