座廁水箱漏水不停｜配件、維修、更換時機

座廁漏水先分類：三步自己檢查漏喺邊

處理座廁漏水前，第一步係確認水係喺邊度漏，因為唔同位置嘅原因同處理方法完全唔同。以下三步唔使工具都做到：

1. 聽：冇人用廁所時，水箱仍然間中有「嘶嘶」入水聲，或者每隔一段時間自己補水，代表水箱內部有漏，即係俗稱「長流水」。
2. 色素測試：打開水箱蓋，喺水箱入面滴幾滴食用色素或有色飲品，唔好沖水，等 15 至 30 分鐘。如果座廁盆入面嘅水變咗色，代表出水閥封唔實，水由水箱慢慢流入盆內。
3. 摸同睇：用乾紙巾抹一次水箱底、角尺掣、軟喉接口同座廁底座四周，隔一陣再睇邊張紙濕咗，就知外漏位置。

水箱長流水原因同配件：入水閥、出水閥點分

水箱長流水大部分同兩件配件有關：入水閥（控制幾時入水、入到幾高）同出水閥（沖水時打開、平時封住水箱底嘅閥）。下表幫你對症判斷：

買配件前，最好影低水箱入面嘅配件同型號，甚至拆落嚟帶去五金舖比對。唔同牌子嘅出水閥尺寸、高度同按掣方式都唔同，買錯會裝唔落或者沖水量唔夠。

如果係分體式座廁，配件一般較易配；連體座廁或者掛牆式隱藏水箱，配件多數要跟原廠型號，部分要由沖水面板位拆入去換，唔熟悉嘅話交畀師傅處理較穩陣。

角尺掣、軟喉同底座漏水：邊啲要搵師傅

水箱外漏最常見係角尺掣同軟喉。角尺掣用耐咗會鏽蝕、關唔實，軟喉外層編織網生鏽或者接口膠墊老化，都會慢慢滴水。

可以自己處理嘅情況

• 軟喉接口輕微滲水：先關角尺掣，檢查膠墊有冇移位，重新上緊或者換新軟喉。
• 按掣或連桿失靈：打開水箱蓋調校或更換按掣組件。
• 入水閥水位過高：按配件上嘅調節螺絲或扣位調低水位。

建議交畀師傅嘅情況

• 角尺掣本身漏或關唔實：換角尺掣要關總掣，舊式鐵喉位有機會一扭就爆，唔熟手唔好試。
• 座廁底座滲水：通常係座廁與去水口之間嘅密封失效，要拆起座廁重新做密封，再裝返同打膠。只喺外圍補膠會將水困喺底，情況可能更差。
• 牆身或地台內滲水：涉及暗喉或防水層，要開牆或開地台檢查。

公屋住戶要留意，部分維修屬房署負責範圍，先向屋邨辦事處查詢會較好，詳情可參考 公屋小型維修懶人包。私樓如果懷疑滲水影響樓下，可以同管理處或樓下住戶溝通，及早安排檢查。

幾時應該換成個座廁？維修定更換點判斷

座廁唔係一漏就要換，但以下情況換成個座廁通常比繼續維修更化算：

1. 瓷身有裂紋：無論喺水箱定座盆，裂紋會隨時間擴大，唔可以用膠補住就算。
2. 配件已停產：舊式或冷門牌子嘅水箱配件買唔到，用通用配件又經常唔夾。
3. 反覆維修：同一個座廁一年內要搵幾次師傅，維修費加埋都唔少。
4. 沖水力長期唔夠：經常要沖兩次，或者經常塞，可能同座廁設計或內部積垢有關。
5. 配合浴室翻新：既然要重鋪地磚或重做防水，座廁一併換最慳工。

換座廁最重要係先度坑距（牆身完成面至去水口中心嘅距離），揀返同坑距嘅型號，避免要用移位器。揀款細節可以睇 廁所翻新換座廁懶人包；想同時換龍頭花灑等配件，可參考 廁所翻新五金配件懶人包。

座廁漏水唔理會有咩後果？日常預防方法

座廁長流水唔止浪費水，長期滲漏仲可能令地台防水層受壓、磚底積水、樓下天花出現水跡。香港住宅上下層相連，一旦影響樓下，處理起上嚟涉及鄰居溝通同維修責任，時間同成本都會增加。

日常預防貼士

• 唔好喺水箱入面放清潔錠或漂白劑，部分化學品會加快膠墊老化。
• 每隔一段時間做一次色素測試，及早發現長流水。
• 角尺掣每年開關幾次，避免長期唔郁咗而生鏽卡死。
• 軟喉見到外層生鏽或者變形，就算未漏都應該換。
• 唔好將濕紙巾、貓砂等沖落座廁，減少塞渠同回水。

如果你嘅浴室已經用咗好多年，座廁、去水同防水都開始有問題，可以考慮一併評估。整體要唔要大拆，可以參考 廁所翻新定全拆。雋域設計可以上門度尺同檢查現況，再逐項列明建議嘅工程範圍。

常見問題